Dharbaaxo Cusub: Turkiga oo ku dhawaaqay inuu si toos ah uga qayb-galayo dagaalka ka dhanka ah Al-Shabaab
ANKARA — Dowladda Turkiga ayaa markii ugu horreysay si rasmi ah u shaacisay inay si toos ah u taageeri doonto dagaalka ka dhanka ah kooxaha hubeysan ee ka howl-gala Soomaaliya, gaar ahaan Al-Shabaab iyo kooxda Daacish. Go’aankan ayaa loo arkaa isbeddel weyn oo ku yimid istaraatiijiyadda Ankara ee ku aaddan amniga Geeska Afrika.
Wasiirka Arrimaha Dibadda ee Turkiga, Hakan Fidan, oo ka hadlayay jihada cusub ee dalkiisu u qaatay la-dagaallanka argagixisada, ayaa caddeeyay in Soomaaliya ay tahay meesha ugu horreysa ee ay ka bilaabayaan taageeradooda tooska ah.
“Turkiga wuxuu si toos ah u garab istaagi doonaa ciidamada Soomaaliya ee kula dagaallamaya gudaha kooxaha Al-Shabaab iyo ISIS,” ayuu yiri Fidan, isagoo intaas ku daray in qorshahoodu yahay inay ballaariyaan iskaashiga dhanka amniga iyo howl-gallada ka dhanka ah kooxahaas.
Ma ahan Soomaaliya kaliya
Wasiirka ayaa sidoo kale tilmaamay in taageerada Ankara aysan ku koobnaan doonin Soomaaliya oo kaliya, balse ay qorsheynayaan inay caawiyaan dalalka kale ee Afrikaan ah ee la tacaalaya khatarta kooxaha hubeysan, isagoo tusaale u soo qaatay dalka Nigeria.
Xiriirka Turkiga iyo Afrika
Turkiga ayaa muddooyinkii u dambeeyay ka mid ahaa dalalka sida dhow ula shaqeeya waddamada Afrika, gaar ahaan dhinacyada tababarka ciidanka, qalabeynta, iyo horumarinta nidaamyada isgaarsiinta ee loo isticmaalo dagaallada lagula jiro kooxaha mintidka ah. Tallaabadan cusub ayaa muujinaysa in Turkigu uu haatan doonayo inuu door firfircoon oo muuqda ku yeesho fagaaraha dagaalka.
