Masiibo ka dhacday Ahraamta Teotihuacán: Nin hubeysan oo xasuuq ka geystay goob dalxiis oo caan ah
Mexico City — Hal qof ayaa geeriyooday, ugu yaraantii 13 kalena waa ay dhaawacmeen ka dib markii weerar hubeysan uu ka dhacay goobta taariikhiga ah ee Ahraamta Teotihuacán ee dalka Mexico. Weerarka oo dhacay abbaare 11:30 subaxnimo, ayaa argagax iyo fowdo weyn ku abuuray boqolaal dalxiisayaal ah oo xilligaas ku sugnaa dusha sare ee Ahraamta Dayaxa (Pyramid of the Moon).
Mas’uuliyiinta amniga ee Mexico ayaa sheegay in ninka weerarka geystay uu ahaa Julio Cesar Jasso, oo 27 jir u dhashay dalkaas. Jasso ayaa la sheegay inuu rasaas aan loo meel deyin ku furay dadka, ka dibna uu isna is-dilay. Toddobo qof ayaa ku dhaawacantay rasaasta tooska ah, halka lix kale ay waxyeello ka soo gaartay jahwareerkii iyo is-buurashadii ka dhalatay rasaasta, iyadoo dadka qaarkood ay ka dhaceen jaranjarooyinka dhaadheer ee ahraamta xilli ay isku dayayeen inay baxsadaan.
Dadka waxyeelladu soo gaartay ayaa ka soo kala jeeda dalal kala duwan sida Mareykanka, Ruushka, Brazil, iyo Canada, waxaana ku jira carruur iyo dad waayeel ah oo da’doodu u dhaxayso 6 ilaa 61 sano. Muuqaallo lagu baahiyay warbaahinta ayaa muujinayay ninka weeraryahanka ah oo hubka la taagan dusha sare ee ahraamta, xilli dadka dalxiisayaasha ah ay dhuumasho iyo carar iskula jireen.
Madaxweynaha Mexico, Claudia Sheinbaum, ayaa si kulul u cambaareysay falkaan, waxayna ballan-qaadday baaritaan dhab ah oo lagu ogaanayo sida uu ninkaan hubeysan ku galay goobtaas oo ah goob dhaxal caalami ah oo ay aqoonsan tahay UNESCO. Dhacdadan ayaa dhalisay su’aalo adag oo ku saabsan nidaamka amniga ee goobaha dalxiiska Mexico, maadaama baaritaannadii adkaa ee lagu mari jiray albaabka laga galo ahraamta la sheegay in dhowaan la dabciyay.
Hay’adda Taariikhda iyo Anthropology-ga Mexico ayaa si degdeg ah u xirtay goobta Teotihuacán ilaa amar dambe, si loo xaqiijiyo ammaanka loona oggolaado baarayaasha inay shaqadooda dhammaystiraan.
