Wasaaradda Difaaca ee Dowladda Federaalka Afghanistan ayaa si kulul u cambaareysay waxa ay ku tilmaantay ku xadgudub ballaaran oo dhanka hawada ah oo ay ciidamada cirka ee Pakistan ka geysteen gudaha Afghanistan, iyagoo beegsaday laba goobood oo ay mid kamid ah ku taallo magaalada Kabul.
Qoraal rasmi ah oo lagu baahiyay barta rasmiga ah ee Wasaaradda Gaashaandhigga ee baraha bulshada, gaar ahaan barta ‘X’ (horey Twitter), ayaa lagu sheegay in diyaaradaha dagaalka ee Pakistan ay mar kale jebiyeen xuduudaha hawada Afghanistan, ayna duqeymo ka fuliyeen suuq ku yaalla gobolka Paktika, meel u dhow magaalada Kabul iyo xadka Durand Line.
War-saxaafadeedka ayaa sidoo kale xusay in dhacdadani ay imaneyso xilli maalmaha Khamiista iyo habeenkii Jimcaha baraha bulshada ee Pakistan iyo Afghanistan ay hadal hayeen warar sheegaya in ciidamada cirka ee Pakistan ay duqeeyeen goobo kala duwan oo ku yaalla caasimadda Kabul.
Ilaa iyo hadda, dowladda Pakistan kama aysan bixin wax jawaab rasmi ah oo ku saabsan eedeymahan ay dowladda Afghanistan u jeedisay.
