Waxaa Maanta degmooyin ka tirsan Gobolka Gedo Koonfurta Soomaaliya ka dhacay Banaanbaxyo waaweyn oo looga soo horjeeday War-muriyeedkii kasoo baxay Shirkii Musharaxiinta xilka Madaxweynaha Soomaaliya ee ka dhacay Muqdisho.
Boqolaal qof oo isugu jiray Odayaal, Haween iyo dhalinyaro ayaa isugu tegay fagaarayaal waaweyn oo ku yaalla degmooyinka Gedo, iyagooan ahaa kuwo aad uga soo horjeeday War kasoo yeeray Musharaxiinta ee ahaa in Gedo laga saaro Ciidanka dowladda.
Banaanbaxayaasha ku qeylinayay erayo ay uga soo horjeedan Musharaxiinta, isla markaana ay ku taageerayeen dowladda Federaalka Soomaaliya iyo Madaxweyne Maxamed Cabdullaahi Farmaajo.
Sidoo kale Banaanbaxayaasha ayaa watay Sawirrada Madaxweyne Farmaajo iyo boorar ay ku xardhan yihiin Erayo taageero loogu muujinayo Madaxweynaha oo ku aadan in mar kale dib loo soo doorto iyo olohihiisa Doorashada.
Mas’uuliyiin kala duwan oo ka tirsan Maamulka Gobolka Gedo ee dowladda Federaalka ayaa qeyb ka ahaa banaanbixii Maanta ka dhacay, iyagoona sheegay in Musharaxiinta xilka Madaxweynaha yihiin kuwo doonaya inay abuuran qalalaaso siyaasadeed.
Dhinaca kale Guddoomiyaha Gobolka Gedo ee dowladda ayaa Musharaxiinta xilka Madaxweynaha ku tilmaamay inay u baahan yihiin in la geeyo Isbitaalo, iyagoona sheegay inay kasoo horjeedan in Gedo laga saaro Ciidanka dowladda ay halkaas kal horey ku daad-gureyay.