Madasha Xisbiyada Qaran ee uu hogaamiyo Madaxweeynihii hore ee Soomaaliya Sheekh Shariif Sh Axmed ayaa War-saxaafadeed kasoo saaray isku-day ay sheegeen inuu u muuqday weerar gaadmo ah oo la doonayay in lagu beegsado Xarunta Madasha iyo hoyga Sheekh Shariif.
Qoraalka Madasha Xisbiyada ayaa waxaa lagu sheegay in Isku-dayga weerarkaas uu ahaa mid lagu bartilmaameedsanayay hogaamiyaha Madasha Sheekh Shariif, iyagoona arrintaas ku tilmaamay mid lagu abuurayo xasilooni-darro Siyaasadeed iyo amni darro.
Sidoo kale Madasha ayaa Madaxtooyadda Soomaaliya ku eedeysay inay weerarka la qorsheysanayay ay gadaal ka taagneyd, waxaana ay sheegeen in aysan jirin sabab habeen madow Ciidamo ka tirsan dowladda loo dul-geeyo Guriga Sheekh Shariif.
Ugu dambeyntii Madasha Xisbiyada Qaran ayaa Saraakiisha iyo Ciidanka dowladda uga digay in loo adeegsado hurinta Colaado iyo Isku dhacyo Ciidan.
Wasiirka amniga Xukuumadda Soomaaliya Maxamed Abuukar Islow Ducaale ayaa beeniyay in Ciidamo ka tirsan dowladda la dul dhigay Guriga Madaxweynihii hore ee Soomaaliya Sheekh Shariif Sh Axmed oo ku yaalla agagaarka Garoonka Aadan Cadde.
Hoos ka Akhriso Qoraalka kasoo baxay Madasha Xisbiyada.
