Magaalada Garoowe ee Caasimadda maamulka Puntland ayaa Maanta oo Axad ah waxaa lagu wadaa inuu si rasmi ah uga furmo Shirka wadatashiga Puntland oo uu Iclaamiyay Madaxweyne Saciid Cabdullaahi Deni.
Shirka ayaa waxaa ka qeyb galaya Madaxweyneyaashii hore ee Puntland, Xildhibaano, Wasiiro ka tirsan Xukuumadda Dowladda Federaalka kana soo jeeda Puntland, Odayaal dhaqameed, Culimo iyo xubno kala duwan oo ka socda deegaanada maamulkaas.
Inta uu socdo Shirka ayaa waxaa looga hadli doonaa Arrimo kala duwan oo ay kamid yihiin Aayaha dowlad Goboleedka Puntlland, Khilaafka u dhexeeya dowladda Federaalka iyo maamulkaas iyo qodobo kale oo muhiim ah.
Madaxweynaha Puntland Saciid Cabullaahi Deni ayaa la filayaa in Shirkaas uu Maanta si rasmi ah u furo, isagoona jeedin doona Khudbad uu uga hadli doono Arrimo kala duwan oo aadan Khilaafka dowladda Federaalka iyo maamulka Puntland.
Dhinaca kale Ciidamo farabadan oo ka tirsan kuwa amniga Puntland ayaa la dhigay Wadooyinka waaweyn ee Magaalada Garoowe, kuwaasi oo sugaya amniga, siddoo kalena baaritaano ku sameeynaya gaadiidka noocyadiisa kala duwan.
Si kastaba Ammaanka guud ee Magaalada Garoowe ee Caasimadda maamulka Puntland ayaa siweyn loo adkeeyay, waxaana gebi ahaan la fasaxay Goobaha Waxbarashada ee ku yaalla halkaas ilaa iyo uu kasoo dhamaanayo Shirka.
