Sarkaal Maraykan ayaa sheegay inay rumeysan yihiin inay dileen Xamsa Usaama Bin Laadin, kaasi oo horey madaxiisa loo dul-dhigay Abaal-marin Lacageed o odhan Hal million oo Dollar.
Sarkaalkaasi oo aan fasax u haysanin inuu Saxaafadda la hadlo waxa uu ka gaabsaday inuu faahfaahino kale bixiyo xilliga la dilay iyo halka lagu dilo Xamsa Usama Bin Ladin.
Madaxweyne Trump oo shalay wax laga weydiiyey arrintaasi waa uu ka gaabsaday, kadib, markii uu Telefishinka NBC News markii ugu horreysay baahiyey arrintaasi.
Wargeyska The New York Times waxa uu qoray inay Maraykanka door ku lahaayeen hawlgalka horseeday in Xamsa Usama Bin Ladin la dilay labadii sanno ee la soo dhaafay.
Xamsa Bin Ladin oo da’da lagu qiyaasay 30-jir waxa uu horey ugu baaqay in la beegsado Ciiddanka Maraykanka ee dibedaha joogo, isagoo dhanka kale ugu baaqay Kooxaha Qabaa’illadda Sacuudiga inay la midoobaan Al-qaacidada Yemen si ay ula dagaalamaan Dowladda Sacuudiga.
Bishii Maarso ee la soo dhaafay, Dowladda Sacuudiga waxay shacaisay inay Xamsa Bin Ladin kala laabteen dhalashadiisa, kadib, Amar Boqortooyadda ka soo baxay bishii November ee sannadkii hore.
Dhinaca kale, Usama Bin Ladin oo ahaa Asaasihii Ururka Alqaacida waxa lagu dilay magaalladda Abotabad ee dalka Pakistan bishii May 3-dii ee sannadkii 2011-kii.
