Warar dheeraad ah ayaa ka soo baxaya Qaraxyo Maanta ka dhacay Magaalada Muqdisho,kuwaasi oo geystay khasaaro isugu jira dhimasho iyo dhaawac.
Qaraxa koowaad oo ahaa Gaari laga soo buuxiyay waxyaabaha qarax ayaa waxaa uu ku qarxay agagaarka Taallada Sayidka ee Muqdisho gaar ahaan meel ku dhow Xarunta Golaha Shacabka.
Taliyaha Ciidanka Booliska Soomaaliyeed Sarreeye Gaas Bashiir Cabdi Maxamed Ameeriko oo Caawa warbaahinta Shir Jaraa’id ugu qabtay Magaalada Muqdisho ayaa waxaa uu sheegay in qaraxa koowaad uu ka dhacay agagaarka Taalada Sayidka,isla markaana ay ku dhinteen 9 ruux,halka 25 kalena ay ku dhaawacmeen.
Sidoo kale Taliyaha ayaa waxaa uu sheegay inay qaraxa labaad uu ka dhacay agagaarka Hotelka lagu magacaabo AFRICO oo ku yaalla Isgoyska KM4 ee Muqdisho gaar ahaan meel ku dhow Bar Koontarool oo Ciidamada ay ku leeyihiin ku taalla wadada aada dhinac Garoonka diyaaradaha Aadan Cadde.
Isaga oo sii hadlaayay Taliye Ameeriko ayaa waxaa uu tilmaamay in qaraxii labaad uu ku dhintay Ninkii waday gaariag qarxay,isla markaana uu ku dhaawacmay Nin kale oo la socday,kaasi oo markii dambe Ciidamada amniga gacanta ay ku dhigeen.
Taliyaha Ciidanka Booliska Soomaaliyeed Sarreeye Gaas Bashiir Cabdi Maxamed Ameeriko ayaa waxaa uu sheegay in Ciidamada amniga ay ku raadjoogeen qaraxyadii Maanta ka dhacay Magaalada Muqdisho.
War qoraal ah oo lagu baahiyay baraha Internet-ka Al-shabaab ayaa waxa ay ku sheeteen Mas’uuliyadda Qaraxyadii Maanta ka dhacay Magaalada,isla markaana sheegay inay la beegsadeen Koontaroolo ku yaalla Muqdisho.
