Warar dheeraad ah ayaa ka soo baxaya weerar loo adeegsaday Bam gacmeed oo xalay ka dhacay Degmada Dhoobleey ee Gobolka Jubbda Hoose,kaasi oo lagu qaaday Guri uu halkaasi ka degan yahay Sarkaal ka tirsan Ciidamada maamulka Jubbaland.
Weerarkan ayaa waxaa la sheegay inay fuliyeen Kooxo hubeysan oo aan la aqoon waxa ay ahaayeen,isla markaana dhowr bam gacmeed ku tuuray Guriga Sarkaalka,waxaana ka dhashay Khasaaro isugu jira dhimasho iyo dhaawac.
Weerarka ayaa waxaa ku dhaawacmay Saraalka ka tirsan Ciidamada Jubbaland weerarka lagu qaaday gurigiisa,waxaana ku dhintay Hal Askari,iyadoona ay ku dhaawacmeen 6 ruux oo kale,kuwaasi oo la dhigay Isbitaalka Dhoobleey.
Dadka deegaanka ayaa waxaa ay sheegeen in weerarka kadib ay maqleen rasaas xoogan oo loo maleynaayo inay isdhaafsadeen ragii weerarka soo qaaday iyo Ilaalada Sarkaalka,waxaana halkaasi si deg deg ah uga baxday kooxihii ka dambeeyay falkaasi.
Ilaa iyo hada ma jiro wax war ah  oo ka soo baxay maamulka Jubbaland oo ay uga hadlayaan Weerarkii xalay ka dhacay Degmada Dhoobleey ee Gobolka Jubbada Hoose.
