Warar dheeraad ah ayaa ka soo baxaya qarax Xoogan oo ka dhacay gudaha Magaalada Boosaaso ee Xarunta Gobolka Bari,kaasi oo geystay Khasaaro.
Qaraxa oo ahaa nooca miinada dhulka lagu aaso ayaa waxaa lala Eegtay Gaari uu lahaa Guddoomiyaha Gobolka Bari Yuusuf Maxamed Wacays (Dhedo) xili uu marayay Wado uu ku yaalla Hotelka Jubba ee Magaalada Boosaaso.
Dadka deegaanka ayaa waxa ay sheegeen in qaraxa markii uu ka dhacay Cirka ay isku shareertay qiiq iyo Uuro Madow,isla markaana Jugtiisa si weyn looga maqlay Xaafado ka tirsan Booasaaso.
Ugu yaraan 3 askari ayaa ku dhaawacmay qaraxaasi,kuwaasi oo la socday gaarigii uu qarxa haleelay,iyadoo xiligaas uusan la socon Guddoomiyaha Gobolka Bari Yuusuf Maxamed Wacays.
Dhaawaca soo gaaray Askarta ayaa waxaa loo qaaday Isbitaalka weyn ee Magaalada Boosaaso ee Xarunta Gobolka Bari,si halkaasi loogu dabiibo xaaladooda Caafimaad.
Ciidamo ka tirsan kuwa amniga Boosaaso ayaa goobta uu qaraxa ka dhacay tegay,iyagoo xiray aaga uu ka dhacay,waxaana sidoo kale halkaasi ay ka wadaan baaritaano kala duwan.
Ilaa iyo hada ma jirto cid sheegatay Mas’uuliyada qaraxaasi Maanta uu ka badbaabay Guddoomiyaha Gobolka Bari Yuusuf Maxamed Wacays (Dhedo) oo Gaarigiisa lala eegtay.
