Warar dheeraad ah ayaa kasoo baxaya qarax Caawa ka dhacay Magaalada Muqdisho,kaas oo geystay khasaaro kala duwan.
Qaraxaan oo loo adeegsaday Gaari laga soo buuxiyay waxyaabaha qarxa ayaa ka dhacay Albaabka dugsiga tababarka Ciidanka Booliska Soomaaliya ee Genaraal Kaahiye,waxaan halkaas ay tahay meel si weyn loo ilaaliyo oo ay ku sugan Ciidamo badan oo ka tirsan dowladda.
Qiiq iyo uuro ayaa cirka isku shareerartay,taasi oo laga arkaayay degmooyinka Gobolka Banaadir,waxaana Qarax uu ahaa mid jugtiisa si weyn Caawa looga maqlay Magaalada oo dhan.
Ugu yaraan hal ruux ayaa la xaqiijiyay in uu ku dhintay qaraxaas,waxaana ku dhaawacmay in ka badan 10 ruux,iyadoo xiligaas goobta ay ku sugnaayeen dad badan sida la sheegay.
War qoraal ah oo lagu daabacay baraha internet-ka Al-shabaab ayaa waxa ay ku sheegteen Mas’uuliyada qaraxa Caawa,iyagoona sheegay inay la beegsadeen meel isku imaatin ah oo ay fariisan jireen Saraakiisha Ciidamada Police-ka iyo kuwa amniga.
Qaraxaan Caawa ka dhacay Magaalada Muqdisho gaar ahaan dugsiga tababarka ee Genaraal Kaahiye ayaa waxa uu kusoo aadayaa iyadoo amniga Magaalada aad loo adkeeyay,isla markaana ay xiran yihiin Wadooyinka qaar ee Magaalada.
