Warar lagu kalsoonaan karo ayaa sheegaya in madaxweynaha Somalia Maxamed C/laahi Farmaajo uu wafdi heer Wasiira ah u diray deegaano ka tirsan gobalka Sh/dhxe kuwaas oo saakay aroornimadii hore ay ka baxeen ciidamada dowladda Somalia.
Masuuliyiintaan oo goordhow ka ambabaxay magaalada Muqdisho waxaa hogaaminayo wasiirka amniha Maxamed Abuukar Islow Ducaale,wasiirka Warfaafinta Daahir Maxamuud Gelle iyo Abaanduulaha ciidanka xogga dalka Odawaa Yuusuf Raage.
U jeedada halkaas loogu diray wefdigaan wasiirada ah waxa ay tahay in ay la kulmaan saraakiisha iyo ciidamada soo baneeyay furumaha dagaalka ee degmooyinka Mahadaay Balcad si ay waxa uga ogaadaan arrinta ku aadan cabashada dhinaca mushaaraadka ah ee ay qabaan.
Saakay ayay aheyd markii ciidamo fara badan oo ka tirsan milatariga Somalia ay iskaga soobaxeen fariisimo ay ku lahaayeen deegaano hoostaga Balcad oo ay ka mid tahay Haanshiiq,Qalimow iyo sidoo kale degmada Mahadaay waxaana qaarkood ay u soo ambabaxeen magaalada Muqdisho halka inta kalana ay ku suganyihiin degmada Balcad ee gobalka Sh/dhexe.
