Kadib kulankii dhex maray madaxweynayaasha Soomaaliya iyo Kenya loogana hadlay khilaafka labada adal ayaa waxaa isi soo taraya walaaca xisbiyada Siyaasadda iyo siyaasiyiinta ay ka muujinayaan noxorka wadahadalkaas oo ay sheegeen in aysan dowladdu cadayn wixii sida dhabta ahaa looga hadlay.
Warbaahinta Kenya iyo Itoobiya ayaa werisay in dhinacyadu ay ka hadleen muranka dhinaca badda laakiin Madaxtooyada Soomaaliya ayaa qoraal ay u dirtay Warbaahinta ku sheegtay in kulanka kaliya looga hadlay xoojinta xiriirka labada dal iyo arrinta dibluomaasidadda,
Qoraalka uu soo saaray Xisbiga Wadajir ayaa u qornaa sidaan
“Xisbiga Wadajir wuxuu walaac xoog leh ka muujinyaa hannaanka uu Madaxweynaha Dowladda Federaalka ah ku maaraynayo khilaafka diblomaasiyadeed ee Dowladda Kenya iyo Soomaaliya ka dhex taagan.
Kulankii Nairobi ku dhexmaray 6/maarso/2019 hoggaamiyaasha Itoobiya, Kenya iyo Soomaaliya ayey madaxtooyada Soomaaliya sheegtay in uu ku koobnaa oo keli soo celinta xiriirka diblomaasiyadeed, xalna laga gaaray khilaafkii diblomaasiyadeed ee labada dal ka dhex taagnaa, iyada oo aan laga wada hadal xudduntii khilaafka.
Madaxtooyada Soomaaliya waxay si ula kac ah marin habaabin ugu samaysay shacabka Soomaaliyeed; sababtoo ah suuragal ma ahan in Kenya iyo Soomaaliya ay ka wada hadlaan arrimo uusan khilaaf ka jirin, kana gaabsadaan arrintii khilaafku ka dhashay!
Xisbiga Wadajir wuxuu horay u taageeray hoggaanka dowladda Soomaaliya mowqifkii ay ka qaadatay xallinta khilaafka, wuxuuna ugu baaqay in arrimaha masiiriga ee taabanaya aayaha dalka ku maarayso wadatashi iyo daahfurnaa si loo helo mowqif midaysan oo kalsooni gelin kara shacabka Soomaaliyeed.
Waxaa muuqata in Hoggaanka dowladda uu dhegaha ka furaystay baaqyada qaybaha kala duwan ee bulshada iyo xoogagga siyaasadda kaga imaanaya. Waxaan hoggaanka dowladda kula talineynaa in xalinta khilaafka u maraan diblomaasiyad xirfadaysan, iyagoo ilaalinaya midnimada iyo wadajirka dhulka Soomaaliyeed, waana in ay ka foojignaadaan hannaanka diblomaasiyadeed, mowqifka qaddiyadda iyo dhexdhexaadiyaha intaba.
