Ka-bixitaanka Ciiddanka Burundi ee qeybta ka ah Hawlgalka AMISOM ayaa la sheegay inay horseeday Khilaaf Diplomaasiyadeed oo kale oo weli cakiran.
Tan iyo sannadkii 2007-dii, Hawlgalka AMISOM waxay dagaal kula jireen Dagaalamayaasha Alshabaab, iyadoo boqolaal ka tirsan Ciiddanka AMISOM lagu dilay Hawlgaladaasi.
Dalka Burundi oo Ciiddanka labaad ee ugu badan ka joogaan Somalia ayaa waxay ka biyo-diidsan yihiin Go’aankii Golaha Amniga iyo Nabadda ee Midowga Afrika ka soo baxay bishii December ee sannadkii hore, kaasi oo lagu go’aamiyey in 1,000 ka mid ah 5,400 Askari ee ka socota Burundi dib loogu celiyo dalkooda hooyo dabayaaqadda bishii la soo dhaafay ee Feberaayo ee sannadkan.
Madaxweynaha dalka Burundi, Pierre Nkurunziza waxa u uka hor yimid Qorshahaasi Daadgureynta, iyadoo Saraakiisha dalkaasi sheegeen inay taasi khatar ku tahay Amniga Gobalka, waxayna u dacwoodeen Ururka Midowga Afrika.
Inkastoo bishii Feberaayo 21-dii iyo 23-dii ay 400 oo Askari u dhalatay Burundi dib loogu celiyey dalkooda, haddana Dowladda Burundi waxay ilaa iyo hadda ka biyo diidsan tahay qorshaha lagu daad-gureyn lahaa 600 Askari ee ka mdi ah 1,000-kii Askari ee horey loo qooneeyey in dib loogu celiyo dalkooda hooyo.
Dhinaca kale, waxaa weli taagan Xiisad Diplomaasiyadeed oo ka dhashay Baaqii Madaxweynayayaasha Somalia iyo Burundi ku dalbadeen inay Madaxda Ururka Midowga Afrika isugu yimaadaan kulan Degdeg ah oo looga hadlayo Qorshaha Ciiddanka Burundi oo keliya looga daad-gureynayo Hawlgalka AMISOM.