Maanta oo Sabti ah ayaa lagu waday in Xarunta Golaha Shacabka ee Magalada Muqdisho uu ka furmo kulanka Baarlamaanka Soomaaliya kaas oo la isku khilaafsanaa Ajenadaha Maanta kulankaas looga doodi lahaa balse la shaaciyay in uu baaqday.
Xiisad ayaa ka dhalatay mooshinkii laga gudbiyey Gudoomiyaha Golaha Shacabka Soomaaliya taas ayaana saameyn ku yeelatay guddoonka Golaha Shacabka Soomaaliya,iyada oo gudoomiye Jawaari uu sheegay in kulanka looga hadlayo xiisada Balad Xaawo halka gudoomiye ku xigeenka 1aad uu isna sheegay in mooshinka Jawaari laga doodayo.
Warar aan helnay ayaa waxa ay sheegayaan in codsi ka yimid Madaxweynaha Soomaaliya Maxamed Cabdullaahi Farmaajo kulanka Maanta uu u baaqday,waxana xusid mudan in Maanta inta badan Wadoooyinka Muqdisho ay xiran yihiin.
Xalay waxaa shirar iyo Warsaxaafadeedyo soo kala saaray guddoomiye kuxigeenka 1aad Cabduwweli Muudeey oo u sheegay in aan wax hub ah lala geli Karin Xarunta Baarlamaanka halka gudoomiye ku xigeenka 2aad uu isna sheegay in Xildhibaanada ay xasaanad leeyihiin,isla markaana ay isdifaaci doonaan.
Xiisada iyo khilaafka Golaha Shacabka u dhaxeeya ayaa cirka isku sii shareereysa taas oo ka dhalatay mooshinka Jawaari,waxaana haatan jira in kulankii Baarlamaanka uu Maanta baaqday kadib codsi ka yimid Madaxweyne Maxamed Cabdullaahi Farmaajo.