Saraakiil ka tirsan EAC oo booqday Isbitaalka Vijibweni xilli dhakhaatiir Soomaali ah ay adeegyo bilaash ah ka wadaan
Saraakiil ka tirsan iskaashiga milatari ee dalalka xubnaha ka ah Ururka Bulshada Bariga Afrika (EAC) ayaa booqday Isbitaalka Vijibweni ee degmada Kigamboni, Dar es Salaam, Tanzania, halkaas oo dhakhaatiir Soomaali ah ay qeyb ka yihiin howl caafimaad oo bilaash ah oo loogu adeegayo bulshada.Booqashadu waxay ku soo beegantay toddobaadka lixaad ee EAC Armed Forces Civil-Military Cooperation (CIMIC) Week, oo Tanzania ka soconaya 26-ka Agoosto ilaa 1-da Sebtembar 2026. Barnaamijkan waxaa ka qeyb qaadanaya kooxo caafimaad oo ka kala socda Burundi, Kenya, Rwanda, Soomaaliya, Uganda iyo Tanzania.Intii ay saraakiishu ku jireen Vijibweni, waxaa loo soo bandhigay adeegyada caafimaad ee halkaas laga bixinayo iyo kaalinta ay dhakhaatiirta Soomaaliyeed ka qaadanayaan howlaha caafimaad ee bulshada loogu adeegayo.
Sida lagu sheegay warbixinta la bixiyay, dhakhaatiirta Soomaaliyeed ayaa toddobaadkan bixiyay adeegyo ay ka mid yihiin daaweyn iyo la-talin caafimaad, iyadoo adeegyada loogu talagalay dadka aan awoodin inay iska bixiyaan kharashaadka caafimaadka. Bukaannada ka faa’iideysanaya adeegyada waxaa ka mid ah carruur, waayeel iyo hooyooyin.
Warbixinno laga helay Tanzania ayaa xaqiijinaya in Vijibweni Hospital uu ka mid yahay xarumaha caafimaad ee loo asteeyay barnaamijka CIMIC, kaas oo lagu bixinayo adeegyo caafimaad oo takhasus leh. Wasaaradda Caafimaadka Tanzania waxay diiwaangelisay Vijibweni inuu yahay isbitaal heer degmo ah oo dowladeed, kuna yaalla degmada Kigamboni ee gobolka Dar es Salaam.
Barnaamijka guud ee EAC CIMIC Week kuma koobna caafimaadka oo keliya. Saraakiisha Tanzania waxay sheegeen in howlaha toddobaadkan ay sidoo kale ka mid yihiin taageerada xarumaha carruurta, xabsiyada iyo dayactirka qaar ka mid ah xarumaha adeegga bulshada ee Tanzania. Adeegyada caafimaadkana waxaa laga fulinayaa goobo ku yaalla Dar es Salaam, Pwani, Arusha iyo Zanzibar.
Tanzania waxay markii ugu dambeysay martigelisay barnaamijkan sanadkii 2022, halka Soomaaliya la filayo inay martigeliso munaasabadda xigta, sida ay sheegtay warbaahinta dowladda Tanzania ee Daily News.
EAC CIMIC Week waxaa loo adeegsadaa xoojinta iskaashiga ciidamada dalalka Bariga Afrika, iyadoo ciidamada iyo shaqaalaha rayidka ah ay si wadajir ah uga qeyb qaataan howlaha bani’aadannimo iyo adeegyada bulshada. EAC ayaa hore u sheegtay in barnaamijyada noocan ah ay diiradda saaraan caafimaadka, horumarinta bulshada iyo xoojinta xiriirka u dhexeeya ciidamada iyo bulshada.
Howlaha caafimaad ee Vijibweni ayaa sidaas darteed noqday mid ka mid ah goobaha ay ka muuqato ka-qaybgalka Soomaaliya ee iskaashiga gobolka, iyadoo dhakhaatiirta Soomaaliyeed ay qeyb ka yihiin kooxaha caafimaad ee adeegyada u fidinaya bulshada Tanzania inta uu socdo barnaamijka EAC.
