Dawladda Israel ayaa ku dhawaaqday inay baabi’isay qorshihii ay ku doonaysay inay muhaajiriin Afrikaan ah ku soo celiso Afrika iyadoo ay ku beddeshay heshiis ay la gashay Hay’adda Qaramida Midoobay u qaabilsan Qaxootiga (UNHCR), kaas oo uu dhigayo in in ka badan 16,250 oo qof oo Afrikaan ah loo raro dalalka reer Galbeedka. Qorshaha cusub oo ra’iisul wasaaraha Benjamin Netanyahu ku tilmaamay heshiis gaar ah ayaa sidoo kale u oggolaanaya muhaajiriinta kale ee hadhay inay sii joogaan Israel ugu yaraan shan sano oo kale. Tallaabadan ayaa soo afjartay muddo dheer oo muran ka dhashay arrinta dadka Afrikaan ah ee ku sugan Israel kuwaas oo tiradoodu dhan tahay ilaa 37,000.
Heshiiskan ayaa muhiim u ah sababtoo ah wuxuu ka dhigan yahay isbeddel weyn oo ku yimaada siyaasaddii hore ee Israel, taasoo ku lug lahayd in muhaajiriinta lagu celiyo Afrika iyadoo la siinayo $3,500 iyo tikit diyaarad. Bishii Febraayo Israel waxay siisay 20,000 oo muhaajiriin ah oo lab ah waraaqo ku sheegaysa inay laba bilood ku leeyihiin si ay u baxaan ama haddii kale xabsi ku dhici doonaan . Si kastaba ha ahaatee hay’adaha xuquuqda aadamaha ayaa ku dooday in muhaajiriinta badan ay ka carareen dagaal iyo tacaddi, isla markaana soo celintooda Afrika ay khatar ku noqon karto.
Netanyahu ayaa sheegay in dalalka Galbeedka loo rarayo ay ka mid yihiin Canada Jarmalka iyo Talyaaniga, isagoo sheegay in waa ballan uu hay’addu ka qaadatay inay qabanqaabiso oo ay maalgasho. Hay’adda UNHCR ayaa caddaynaysa heshiiska balse faahfaahin dheeri ah kamay bixin . Heshiiskan ayaa imaanaya kadib markii Maxkamadda Sare ee Israel ay bishii Maarso soo saartay amar ku meel gaar ah oo joojinaya hirgelinta qorshihii hore. Qorshaha soo celinta muhaajiriinta ee la baabi’iyay ayaa lagu soo qaaday inuu yahay qarsoodi waxaana jira dukumeentiyo sheegaya in dalal ay ka mid yihiin Rwanda ay diideen inay si rasmi ah u xaqiijiyaan.
