Geneva, Switzerland – Wasiirka Wasaaradda Isgaarsiinta iyo Tiknoolajiyadda ee Jamhuuriyadda Federaalka Soomaaliya, Mudane Maxamed Aadam Macallim Soomaali, ayaa hadal ka jeediyey dooda madasha WSIS Leaders TalkX, oo ay fikradahooda ku wadaagaan madaxda iyo masuuliyiinta sare ee ka qeyb galaya Shirka Heerka Sare ee WSIS+20. Wasiirku waxa uu soo bandhigay horumarka ay Soomaaliya ka sameysay dhismaha Kaabeyaasha Dijitaalka ee Dowladda.
Doodan ayaa muhiim u ah xilligan, sababtoo ah waxay ka dhigan tahay tallaabo cusub oo ay Soomaaliya uga sii dhowaanayso midowga caalamiga ah ee dhanka tiknoolajiyadda, iyadoo ay ka qeyb qaadanayso shirka WSIS+20 oo ah mid ka mid ah shirarka ugu muhiimsan ee arrimaha dijitaalka adduunka. Soomaaliya waxay ka mid tahay dalalka ugu horreeya ee ka hadla horumarka dijitaalka heer caalami ah.
Wasiir Soomaali ayaa sheegay in Dowladda Federaalka Soomaaliya ay mudnaan gaar ah siinayso maalgashiga tiknoolajiyadda iyo horumarinta adeegyada dijitaalka si ay u daboolaan baahiyaha shacabka. Wuxuu sheegay in dhismaha dowlad casri ah uu ku saleysan yahay nidaamyo dijitaal ah oo leh amni, adkeysi iyo kalsooni dadweyne.
Wuxuu yidhi: “Soomaaliya waxay qabatay Shirweynihii ugu horreeyey ee Qaran ee arrintan looga arrinsado, waxaana la diyaariyey Qorshaha Qaran ee Kaabeyaasha Dijitaalka, oo hagaya hirgelinta adeegyo dowladeed oo isku xiran, sugan, laguna kalsoonaan karo.”
Waxaa intaas dheer, Wasiirku wuxuu xusay in Soomaaliya ay sii wadi doonto dadaallada ay ku ballaarinayso iskaashiga caalamiga ah, iyadoo qorshayaheeda ay muujinayaan in ay diyaar u tahay in ay la jaanqaaddo tiknoolajiyadda casriga ah. Hadalka Wasiirka ayaa qeyb ka ahaa doodaha heerka sare ee ay madaxda iyo hoggaamiyeyaasha ka kala socda dalalka dunidu ku soo bandhigayeen aragtiyahooda ku aaddan horumarinta bulshada dijitaalka ah.
Shirkan ayaa muujinaya dadaallada Wasaaradda Isgaarsiinta iyo Tiknoolajiyadda ay ku ballaarinayso iskaashiga caalamiga ah, isla markaana ay ku soo bandhigayso qorshayaasha Dowladda Federaalka Soomaaliya ee la xiriira horumarinta adeegyada dijitaalka iyo dhismaha dowlad casri ah oo ku dhisan tiknoolajiyad.
Si gaar ah diiradda loogu saaray sidii tiknoolajiyadda loogu adeegsan lahaa horumar waara, kobcinta adeegyada bulshada iyo xoojinta iskaashiga caalamiga ah. Soomaaliya waxay muujisay in ay diyaar u tahay in ay ka qeyb qaadato horumarka dijitaalka adduunka, iyadoo ay leedahay aragti cad oo ku aaddan mustaqbalka.
