Wasiir Fiqi oo Maanta Xil Wareejin u Sameeyay Xoghayaha Cusub ee Wasaaradda Gaashaandhigga
Muqdisho — Wasiirka Gaashaandhigga ee Jamhuuriyadda Federaalka Soomaaliya, Mudane Axmed Macallin Fiqi, ayaa maanta guddoomiyay munaasabad rasmi ah oo xilka loogu kala wareejinayay Xoghayaha cusub ee Wasaaradda Gaashaandhigga, Mudane Yuusuf Cali Maxamed, iyo Xoghayihii hore, Mudane Cabdifataax Cabdulqaadir Faarax.
Munaasabaddan oo ka dhacday xarunta wasaaradda, waxaa goob-joog ka ahaa xubno ka tirsan Golaha Baarlamaanka Federaalka, agaasimayaal, iyo saraakiil ka tirsan wasaaradda. Wasiir Fiqi ayaa si weyn ugu mahadceliyay xoghayihii hore, isagoo ku ammaanay dadaalkii iyo hufnaantii uu muujiyay muddadii uu gacanta ku hayay howlaha wasaaradda, wuxuuna xusay inuu door weyn ka qaatay horumarinta adeegyada muhiimka ah.
Dhanka kale, Wasiirka ayaa faray Xoghayaha cusub inuu la yimaado dardar-gelin iyo qorshayaal xoojinaya hufnaanta shaqada. Wasiir Fiqi ayaa carrabka ku adkeeyay in wasaaradda looga fadhiyo inay mudnaanta koowaad siiso xoojinta wada-shaqeynta hay’adaha kala duwan, si loo gaaro yoolalka qaran ee lagu horumarinayo difaaca dalka.
Munaasabadda ayaa kusoo dhammaatay jawi is-afgarad leh, iyadoo lagu ballamay in la sii ambaqaado howlaha muhiimka ah ee horyaalla wasaaradda gaashaandhigga, si loo xaqiijiyo tayada iyo horumarka ciidamada qaranka.
