Baydhabo: Hoggaamiye Jibriil Cabdirashiid oo ka qayb galay dhaarinta Wasiirka cusub ee Beeraha
Baydhabo, Soomaaliya — Hoggaamiyaha ku meel gaarka ah ee Dowladda Koonfur Galbeed, Mudane Jibriil Cabdirashiid Xaaji Cabdi, ayaa maanta xarunta madaxtooyada ee magaalada Baydhabo kaga qayb galay munaasabad lagu dhaarinayay Wasiirka cusub ee Wasaaradda Beeraha iyo Waraabka, Mudane Xasan Cabdi Maxamed.
Munaasabaddan oo ahayd mid si heer sare ah loo soo agaasimay, waxaa goob-joog ka ahaa mas’uuliyiin sarre oo ka tirsan maamulka Koonfur Galbeed, oo ay ku jiraan xubnaha golaha wasiirrada, xildhibaanno, iyo hoggaanka maxkamadda sare. Dhaarinta ka dib, Hoggaamiye Jibriil ayaa hambalyo u diray wasiirka isagoo kula dardaarmay inuu si degdeg ah u guda-galo howlaha baaxadda leh ee horyaalla wasaaradda.
Hoggaamiyaha ayaa si gaar ah u iftiimiyay in wasaaradda beeraha ay tahay laf-dhabarta dhaqaalaha Koonfur Galbeed, loona baahan yahay qorshayaal cusub oo lagula tacaalo caqabadaha isbeddelka cimilada. Waxa uu hoosta ka xariiqay in muhiimadda koowaad la siiyo taageeridda beeraleyda gudaha iyo horumarinta nidaamyada waraabka, si loo xaqiijiyo sugnaanta cuntada iyo kor u qaadista wax-soo-saarka deegaanka.
Magacaabista iyo dhaarinta wasiirka cusub ayaa loo arkaa tallaabo qayb ka ah qorshaha ballaaran ee maamulka Koonfur Galbeed uu ku doonayo inuu ku tayeyno hay’adaha dowladda, si adeegyada bulshada loo gaarsiiyo dadka ku dhaqan gobollada maamulkaas uu ka kooban yahay.
