Dabbaaldegga 12-ka April: Madaxweynaha oo Dhagax-dhigay Xarunta Agoonta CXDS iyo Dhismayaal Cusub
MUQDISHO, Soomaaliya – Madaxweynaha Jamhuuriyadda Federaalka Soomaaliya, ahna Taliyaha Guud ee Ciidamada Qalabka Sida, Mudane Xasan Sheekh Maxamuud, ayaa maanta kormeer iyo munaasabado xarig-jar ah ka sameeyay xarumaha muhiimka ah ee Ciidanka Xoogga Dalka Soomaaliyeed xilli loo dabbaaldegayo sanadguurada 66-aad ee aasaaska ciidanka.
Madaxweynaha ayaa si rasmi ah u dhagax dhigay dhismaha weyn ee loogu talagalay Xarunta Agoonta Ciidanka Xoogga Dalka oo laga hirgelinayo gudaha xerada Fiyaamo. Mashruucan ayaa ah mid si gaar ah loogu daryeelayo ubadka ay ka tageen geesiyaashii naftooda u huray difaaca qaranka Soomaaliyeed, isagoo qayb ka ah qorshaha ballaaran ee dowladda ee horumarinta kaabayaasha ciidanka.
Intii uu kormeerka ku jiray, Madaxweyne Xasan Sheekh wuxuu sidoo kale xarigga ka jaray dhismayaal dhowr ah oo muhiim u ah shaqada ciidanka, kuwaas oo isugu jira Taliska Taakuleynta, xarunta cusub ee Hoggaanka War-isgaarsiinta iyo Teknolojiyadda, iyo sidoo kale xarunta Ajibka Ciidanka. Xarumahan ayaa la filayaa inay wax weyn ka beddelaan hab-socodka shaqada iyo casriyeynta hoggaanka CXDS.
Madaxweynaha oo ka hadlayay muhiimadda maalintan ayaa bogaadiyey saraakiisha iyo askarta qalabka sida, isagoo ku ammaanay naf-hurnimada ay u hayaan dalka. Waxa uu hoosta ka xariiqay in dowladdiisu ay mudnaanta koowaad siinayso daryeelka ciidanka iyo qoysaskooda, gaar ahaan agoonta geesiyaashii qaranka.
Dhismaha cusub ee dhanka teknolojiyadda ah ee maanta la daah-furay ayaa la rajeynayaa inuu ciidanka ka caawiyo sidii ay ula jaanqaadi lahaayeen horumarka milatari ee caalamka ka jira, iyadoo maanta ay ku beegnayd 12-ka April oo ah markii la aasaasay Ciidanka Xoogga Dalka sanadkii 1960-kii.