Wasiirka difaaca Turkiga Hulusi Akar ayaa sheegay in weerar kasta oo ay ku soo qaadaan maleeshiyaadka beriga Libya ee uu hogaamiyo Janaraalka falaagada ah ee Khalifa Xaftar ciidkooda ku sugan waqooyiga ay la kulmi doonaan awood adag.
“Dambiilaha dagaal, dilaaga Xaftar iyo taageeriyaashiisa waa in ay ogaadaan in ay la kulmi doonaan awoodda sharciga haddii ay beegsadaan ciidanka Turkiga, Hulusi Akar ayaa hadalkan u sheegay cutub ka tirsan ciidankooda oo ku sugan caasimadda Libya ee Tripoli xilli uu halkaas ku tagay safar aan horey loo sheegin†ayuu yiri Wasiirka.
Hadalka Wasiirka Gaashaandhigga Turkiga, Hulusi Akar ayaa imaanaya xilli ciidanka la baxay Libyan National Army ee uu hogaamiyo Xaftar ay isu diyaarinayaan in ay weeraraan ciidanka Turkiga ee taageerada u fidiya dowladda QM aqoonsan tahay ee Libya ee loo yaqaano xukuumadda heshiis qaran.
Wasiirka gaashaandhigga ayaa shalay safar ku tagay magaalada Tripoli iyadoo halkaas kulan kula yeeshay mas’uuliyiinta Libya iyo saraakiisha ciidanka ee Turkiga iyo Libya.
Taageerada Turkiga u fidiyay xukuumadda caalamku aqoonsan yahay ee Libya ayaa keentay in ay iska caabiyaan duulaan 14 bilood socday oo xoogaga Janaraal Xaftar ku soo qaadeen caasimadda Libya, iyadoo Xaftar ay taageero siinayeen dalalka; Imaaraadka Carabta, Masar iyo Russia.
