Magaalada Kismaayo ee Xarunta Gobolka Jubbada Hoose ayaa Maanta waxaa kulan ku yeeshay Xildhibaanada Baarlamaanka dowlad Goboleedka Jubbaland.
Kulankaan ay Maanta yeesheen Golaha Wakiilada Jubbaland ayaa ahaa Kalfadhigii 1-aad fadhigiisii 27-aad, waxaana goobjoog ahaa 47 xildhibaan, isla markaana waxaa Shir Guddoominayey Guddoomiye ku-xeenka Labaad ee Baarlamaanka Jubbaland Aadan Khaliif Yuusuf.
Ajendaha kulanka Xildhibaanada ayaa waxaa uu ahaa Fatahaadaha ka dhacay qaybo ka mid ah deegaanada ay maraan Wabiyada Jubba iyo Shabeelle, iyadoona saameynta ugu badan uu geystay Wadiga Shabeelle.
Sidoo kale inta uu socday kulanka Xildhibaanada ayaa looga dooday saamaynta ay yeesheen fatahaadaha ka dhacay qaar kamid ah Gobalada dalka iyo sida looga hortagi karo fataahadda mar walba soo laalaabata.
Ugu dambeyntii Xildhibaanada Baarlamaanka dowlad Goboleedka Jubbaland ayaa ku baaqay in loo gurmado dadkii ay saameeyeen fatahaaduhu, isla markaana tacsi u diray dhammaan intii ku dhimatay musiibadaas.
