Shalay ayaa waxaa Magaalada Kismaayo ee Xarunta Maamulka Jubbaland gaaray Danjiraha Dowlada Ingiriiska u fadhiya Soomaaliya Mr David Concar,isaga oo la kulmay Madaxda Jubbaland.
Wararka ay heshay Dalsan ayaa wax ay sheegayaan in ujeedada wefdiga Safiirka ay qeyb ka tahay sidii xal looga gaari lahaa xiisada Siyaasadeed ee ka dhex taagan Xubno ka mid ah Xildhibaanada Jubbaland iyo Madaxweynaha Jubbaland Axmed Maxamed Islaam (Axmed Madoobe)
Masuuliyiin ka tirsan Madaxtooyada Jubbaland ayaa waxa ay sihoose Dalsan ugu sheegeen in xalay Madaxweyne Axmed Madoobe iyo David Concar ay kulan gaar ah ku yeesheen Xarunta Madxtooyada Jubbaland ee Kismaayo in kastoo aan la shaacin waxyaabihii ka soo baxay.
Sidoo kale Maanta ayaa waxaa dhici doona kulamo gooni gooni ah sixal looga gaaro xiisadaas u dhaxeysa Xubno Xildhibaano ah iyo Madaxweyne Axmed Madoobe.
Dhinaca kale weli waxaa Magaalada Kismaayo ku xiran Xildhibaan Axmed Taajir oo lagu eedeeyay in uu horboodayay tiro Xildhibaano ah oo waday mooshin ka dhan ah Axmed Madoobe,iyada oo gudiga Anshaxa Baarlamanka Jubbaland ay sheegeen in ay xasaanadii kala noqdeen.