Ciidamada badda Mareykanka ayaa sheegay in todobo kamid ah askartii saarnayd Markabka USS FITZGERALD la waayay ugu yaraan 3 kalena uu dhaawac soo gaaray kadib markii ay markabkan dagaal isku dheceen doon ganacsi oo calanka dalka Philippine sidatay meel ku dhow xeebaha dalka Japan aroornimadii saaka.
Ciidamada ilaalada xeebaha Japan ayaa sheegay in dhib uu soo gaaray Markabka dagaal ee Mareykanka, hase yeeshee aanu halis weyn ugu jirin inuu quuso, halka doonta ganacsina ay socodkeeda horey usii wadatay.
Bayaan kasoo baxay ciidamada badda Mareykanka ayaa lagu sheegay in FITZGERALD ay kula dhacday doontan ganacsi meel qiyaastii 56 Mile oo dhinaca badda ah kaga beegan YOKOSUKA, mid kamid ah shilalka faro ku tiriska ah ee ka dhaca marin-biyoodkaasi ciriiriga badan.
Bayaanku waxa uu intaasi ku daray in la badbaadiyay saddex ruux oo uu dhaawac soo gaaray oo uu ku jiro hogaamiyihii markabka Bryce Benson Waxaana la geeyay Isbitaal uu mareykanku leeyahay oo ku yaalla YOKOSUKA.
Waxaa kaloo ay wararku sheegayaan in labo Askari oo kale oo dhaawac ah iyagana Isbitaalka loola cararay kuwaasoo ay soo gaareen dhaawacyo isugu jira jug iyo jajab.
Ma jirto cid wax ku noqotay doontan ganacsi ee sidatay calanka dalka Filibiin ee uu markabkan dagaal ku dhacay.
Waxaana soconaya baaris la xiriirta sababta dhalisay shilkaasi
