Dowladda Soomaaliya ayaa wadatashi ugu yeeratay safiirkeedii u joogay dalka Kenya Jabriil Ibraahim Cabdulle.
U yeerista safiirka ayaa la sheegey in ay la xiriirto safar uu shalay Kenya ku tagay Madaxweynaha Jubbaland Axmed Maxamed Islaan (Axmed Madoobe) oo dowladdu ay saartay xannibaad dhanka socdaalka ah.
Faahfaahin dheeri ah ma aysan bixin dowladda Soomaaliya iyo tan Kenyaba oo ku aadan safarka Axmed Madoobe ee Kenya.
Saraakiil sar sare oo dowladda ah ayaa VOA u xaqiijiyay in loo yeerey Safiirka Soomaaliya ee Kenya si wadatashi loola yeesho.
Xiriirka dowladda federaalka ah iyo Madaxweynaha Jubbaland ayaa bilooyinkii u danbeeyay xumaa, waxaana dowladdu ay u jartey amar lagu soo xiraayo taasi oo ay Jubbalan uga jawaabtey amar kale oo madaxweynaha dowladda federaalka lagu soo xiraayo.
