Guddiga Maamulka doorashooyinka Xildhibaanada Banaadiriga ayaa xalay shaaciyay Jadwalka doorashada kuraas ka tirsan Golaha Shacabka Baarlamaanka 11-aad ee dowladda Federaalka Soomaaliya.
Qoraal ay soo saareen Guddiga doorashada Banaadiriga ayaa waxaa lagu sheegay in qabashada ergada iyo diiwaan-gelinta Musharaxiinta u tartamaya shanta kursi ee Xildhibaanada Banaadiriga ay bilaabaneyso 24-ka bishaan Febraayo 2022.
Guddiga ayaa shaaca ka qaaday in doorashada Golaha Shacabka ee shanta kursi ee Banaadiriga ay dhaceyso 25-ka Febraayo oo maalinta berrito ku beegsan, isla markaana doorashada kuraastaas lagu qaban doono Magaalada Caasimadda ah ee Muqdisho.
Guddiga hirgelinta doorashooyinka heer Federaal ayaa sheegay in xal buuxa laga gaaray khilaafkii ka dhashay doorashada Xildhibaanada Banaadiriga ee Golaha Shacabka Baarlamaanka 11-aad, taasi oo maalmo kahor dib u dhigay Ra’iisul Wasaare Rooble.
Guddiga doorashooyinka ayaa tilmaamay in Guddigii uu Ra’iisul Wasaaraha xilgaarsiinta u xil-saaray xallinta khilaafkii ka dhashay kuraasta Banaadirigu ay xalliyeen buuqii ka dhashay kuraastaas qaarkood oo la isku qabsaday.
Ra’iisul Wasaare Maxamed Xuseen Rooble ayaa maalmo kahor hakiyey qabashada doorashada kuraasta Banaadiriga, kadib markii cabasho u gudbiyeen qaar kamid ah Odayaasha dhaqanka kursi ka tirsan kuraasta Banaadiriga, waxaana doorashada lagu waday inay qabsoonto 21-kii bishaan Febraayo.
