Maleeshiyadda u daacadda ah Madaxa Daacish-ta Somalia, Sheekh C/qaadir Muumin ayaa la sheegay inaysan wax mushaar ah ku qaadanin Hawlgalladda Dagaal ee lagu hawl-geliyo.
Ilo-wareedyo ay soo xigatay Wakaalladda Wararka Faransiiska ee AFP ayaa lagu muujiyey inaysan Dagaalamayaasha aan guursanin ee Kooxda Daacish aan haba yaraatee la siinin wax mushaar ama gunno ah.
Maleeshiyadda Xaasaska qaba ayaa iyagana la sheegay in bishii la siiyo 50-Dollar, halka carruurta yar ee Kooxda Daacish askaraysay bishii la siiyo mushaar u dhexeeya 10 Dollar ilaa 20-Dollar, iyadoo lagu salaynayo hadba da’dooda.
Warbixinta ayaa lagu sheegay in Mushaaraadka Maleeshiyadda Kooxda Daacish ee ku sugan Puntland la siiyo bil kasta lagu qiyaaso 2,000 oo Dollar ilaa 4,000 oo Dollar, iyadoo Hoggaamiyayaasha Kooxdaasi ku kharaj gareeyaan Maleeshiyadooda Lacag xadidan oo ay u soo diraan Hoggaamiyayaasha Daacish ee ku sugan dalalka Syria iyo Iraq..
Dhinaca kale, Warbixin ay soo saartay Kooxda QM ee La-socodka Arrimaha Somalia (The UN monitoring group for Somalia) ayaa lagu sheegay in Kooxda Daacish-ta Puntland oo la asaasay sannadkii hore lagu bilaabay Tobanaan Maleeshiyo, balse ay haatan kordheen oo ay gaarayaan ilaa 200-Maleeshiyo u daacad ah Sheekh C/qaadir Muumin oo ah Muwaadin British laga kansal gareeyey Baasaboorkiisa.
Telefoono laga duubay Sheekh C/qaadir Muumin ayaa muujinaya inuu xiriir la sameeyey Hoggaamiye ka tirsan Daacish oo ku sugan dalka Yemen, kaasi oo matala Hoggaamiyayaasha Sarsare ee Daacish-ta ku sugan Syria iyo Iraq.
