Warbaahinta dalka Masar ayaa sheegtay inuu Madaxweyne C/fataax Al-sisi uu Wicitaan Telefoon ka helay dhigiisa dalka Somalia, Maxamed C/llaahi Farmaajo, iyagoo ka wada hadlay xiriirka labada dal iyo Aragtida Masar ka taagan tahay Midnimadda Somalia.
Madaxweyne Farmaajo waxa uu ku dheeraaday Xiriirka Taariikhig ee labada Waddan, wuxuuna bogaadiyey doorka Dowladda ku taageerayso Somalia iyo Taageeradda lagu soo celinayo Deganaanshaha Somalia.
Madaxweyne Farmaajo waxa kale oo uu ka mahad celiyey Taageeradda Farsamo ee ay Masar siinayso Somalia, gaar ahaan Difaaca Danaha Somalia ee Heer Gobal iyo Heer Caalami.
Madaxweyne Farmaajo waxa uu dhigiisa dalka Masar warbixin ka siiyeey Horumaradii ugu dambeeyey ee laga gaaray Xaalladda Somalia, Tallaabooyinka asy DFS ee soo-celinta Nabadda iyo Ammaanka iyo caqabadaha hor taagan, gaar ahaan La-dagaalanka Alshabaab.
Dhinaca kale, Madaxweynaha dalka Masar, C/fataax Al-sisi waxa uu qiray inuu Xiriir Xooggan ka dhexeeyo Masar iyo Somalia, isla markaana Dowladiisa taageero ka geysan doonto Midnimadda Somalia.
Waxa kale oo Madaxweyne C/fataax Al-sisi sheegay inay sii wadi doonaan Taageeradda Farsamo ee ay siiyaan Shacabka Soomaaliyeed, gaar ahaan Nabadda iyo Deganaanshaha.
Si kastaba ha ahaatee, Wada-hadalka Khadka Telefoonka ku dhex maray Labada Madaxweyne  ayaa la sheegay inuu daba socdo Booqashadii uu Madaxweyne Farmaajo bishii August 20-dii ilaa 22-dii ku tegay  caasimadda dalka Masar ee Qaahira.
Dowladda Masar waxay ka mid tahay Dowladaha Isbahaysiga Khaliijka ee xayiraadda ku soo rogay dalka Qatar, halka DFS sheegtay inay dhexdhexaad ka tahay Qaddiyadaasi, inkastoo ay Maamul-gobaleedyadda taageereen Isbahaysiga Sacuudig.
