Ciidamada Huwanta oo Yaaqbariweyne ku dilay maleeshiyaad hubeysan, kuwo kalena gacanta ku dhigay

Ciidanka Xoogga Dalka, gaar ahaan Guutada 7-aad, iyo Taliska Booliska Degmada ayaa howlgal qorsheysan ka fuliyay tuulooyinka Guudaale, Riiglow iyo Yaaq-biriweyne, kuwaas oo ay maleeshiyaad hubeysan jidgooyooyin uga sameysteen waddooyinka ay maraan gaadiidka xamuulka qaada.

Inta lagu guda jiray howlgalka, ciidamada ayaa kusoo qabqabtay maleeshiyaad wadada ku hakiyay baabuurta xamuulka, kadib markii ay rasaas ku fureen gaadiid ay jidgooyo uga heysteen, xilli ay kusoo baxeen ciidamada Xoogga Dalka iyo kuwa Booliska.

Iska caabin kooban oo dhacay kadib, ciidamada ayaa dilay saddex ka mid ah maleeshiyaadka, halka afar kalena ay nolol kusoo qabteen. Maleeshiyaadka la qabtay ayaa lagu wadaa in loo wareejiyo hay’adaha amniga si maxkamad loo horgeeyo, maadaama hore loogu amray ciidanka in ay soo qabtaan cid kasta oo bulshada caqabad ku noqota.

Taliyaha howlgalka hoggaaminayay, Taliye Axmed Gashaan, ayaa sheegay in ay gacanta ku dhigeen “laba dhaawac ah, laba fayow iyo hubkoodii,” isagoo xaqiijiyay in “saddexna ay goobta ku naf waayeen.” Wuxuu uga digay maleeshiyaadka weli dhuumaleysanaya, isagoo ku booriyay: “Kuwa dhuumaleysanaya waxaan leenahay si sharaf leh isku soo dhiiba.”

Howlgalka ayaa weli ka socda duleedka deegaanka Yaaqbariweyne, waxaana ciidamada ay baadi-goobayaan maleeshiyaad ay maxkamadda ciidamada qalabka sida hore ugu riday xukun dil ah.