Trump oo Obama ku Eedeeyay "Khiyaano Qaran" la Xiriira Doorashadii 2016

Madaxweynaha Maraykanka ee xilka haya, Donald Trump, ayaa si kulul u weeraray Madaxweynihii hore Barack Obama, isagoo ku eedeeyay “khiyaano qaran” la xiriirta faragelinta la sheegay in Ruushka uu ku sameeyay doorashadii guud ee 2016-kii.

Trump oo ka hadlayay Aqalka Cad ayaa sheegay in maamulka Obama uu isku dayay in uu doorashada "xado" si uu uga hor istaago guusha uu ka gaaray Hillary Clinton. “Waxay isku dayeen inay doorashada xadaan,” ayuu yiri Trump, isaga oo ku andacooday in ficilladaasi ay ahaayeen kuwo siyaasadaysan oo lagu beegsanayay ololihiisa.

Afhayeen u hadlay Madaxweyne hore Obama ayaa si degdeg ah uga jawaabay eedeymaha, wuxuuna ku tilmaamay hadalka Trump "isku day daciif ah oo lagu doonayo in dareenka shacabka laga leexiyo."

Warkan ayaa kusoo beegmaya iyadoo weli ay taagan tahay dooda ku saabsan doorka sirdoonka iyo faragelinta dibadda ee doorashooyinka Maraykanka.