Faah faahino dheeraad ah ayaa kasoo baxaya Kooxo hubeysan oo saqdii dhexe ee xalay weerar ku qaaday Guriga uu degan yahay Duqa Magaalada Boorama ee Xarunta Gobolka Awdal Saleebaan Xasan Xadi.
Warar aan heleyno ayaa sheegaya in Ragga weerarka ku qaaday Guriga Duqa Boorama iyo ilaaladiisa ay dhexmartay Is rasaaseyn socotay muddo daqiiqado ah, wallo markii dambe ay iskeed u istaagtay.
Dadka deegaanka ayaa soo weriyay in xalay ay maqlayeen dhawaqa rasaas xoogan, isla markaana ay markii dambe ka war heleen in rag hubeysan ay weerar ku qaadeen Guriga Duqa Boorama.
Intaas kadib ragii hubeysnaa ayaa goobta ka baxsaday, waxaana saakay inta lagu soo waramayaa in xaalada ay degan tahay, sidoo kalena ay howlgal baaritaano ah wadaan Ciidamo ka tirsan kuwa Booliska Somaliland ee ku sugan Boorama.
Ilaa iyo hada lama oga Khasaaraha ka dhashay weerarkii xalay ka dhacay Magaalada Boorama, sidoo kalena ma jiro wax war ah oo kasoo baxay laamaha Maamulkaas oo ku aadan weerarka.