Xiisadda Gacanka: Iiraan oo dib u xirtay Marinka Hormuz xilli go’doominta Maraykanku sii kordhayso
Xaaladda ka taan bariga dhexe ayaa gashay weji cusub oo hubanti la’aan ah ka dib markii dowladda Iiraan ay ku dhawaaqday inay dib u soo rogtay “ilaalo adag” oo lagu xaddidayo dhaqdhaqaaqa Marinka caalamiga ah ee Hormuz. Tallaabadan ayaa timid maalin uun ka dib markii Iiraan ay sheegtay in marinkaas uu u furan yahay maraakiibta, balse waxay hadda sabab kaga dhigtay go’doominta dhanka badda ah ee ay dowladda Maraykanku ku hayso dekedaha dalkaas.
Maamulka Trump ayaa dhankooda xaqiijiyay in go’doomintii ay saareen Iiraan ay wali tahay mid xooggan, iyadoo tan iyo maalintii Isniinta ee toddobaadkan dib loo celiyay in ka badan 20 markab oo doonayay inay ku xirtaan dekedaha Iiraan. Arrintan ayaa qayb ka ah cadaadiska ay Washington saarayso Tehran si looga gaaro heshiis ka ballaaran kii hore.
Dhanka kale, hay’adaha badaha ayaa soo sheegaya khataro dhanka amniga ah oo ka soo kordhay Marinka Hormuz, iyadoo la diwaangeliyay rasaas iyo gantaallo lala beegsaday maraakiib laga leeyahay dalka Hindiya. Inkasta oo Iiraan ay sheegtay inay dib u eegis ku samaynayso qorshayaal cusub oo ka yimid dhanka Maraykanka, haddana wali ma jirto waqti rasmi ah oo loo qabtay in dib loo furo wada-hadallada labada dhinac, xilli ay weli isweydaarsanayaan hanjabaado hawada loo marinayo.
Warbixinnadii ugu dambeeyay ee khasaaraha ayaa muujinaya baaxadda ay leedahay colaaddan. Tan iyo markii ay billowdeen weerarrada Maraykanka iyo Israa’iil ee bishii Febraayo, waxaa la xaqiijiyay inay Iiraan ku dhinteen in ka badan 3,300 oo qof. Lubnaan waxaa lagu dilay 2,100 qof, halka wadamada Gacanka, Israa’iil iyo ciidanka Maraykankaba ay ka dhasheen dhimashooyin kala duwan. In kasta oo xabbad-joojinta u dhaxeysa Israa’iil iyo Lubnaan ay u muuqato mid si daciif ah u shaqaynaysa, haddana Israa’iil waxay wali sii waddaa weerarrada ay ku beegsanayso waxay ugu yeertay khatarta Xisbullaah.