Taliyihii Ciidanka Liibiya oo ku geeriyooday shil diyaaradeed oo ka dhacay Turkiga

Taliyihii Ciidanka Liibiya, Janaraal Maxamed Cali Axmed Al-Xaddaad, ayaa ku geeriyooday shil diyaaradeed oo ka dhacay dalka Turkiga, kaddib markii diyaarad uu la socday ay burburtay fiidnimadii Talaadada.

Janaraalka iyo afar qof oo kale ayaa saarnaa diyaarad nooca Falcon 50 ah, taas oo ka duushay caasimadda Turkiga ee Ankara, kuna sii jeedday magaalada Tripoli ee dalka Liibiya. Sida uu sheegay Wasiirka Arrimaha Gudaha Turkiga, Cali Yerlikaya, xiriirkii diyaaradda ayaa la waayay ku dhowaad siddeed daqiiqo, qiyaastii afartan daqiiqo kaddib markii ay ka kacday garoonka Ankara.

Wasiir Yerlikaya ayaa qoraal uu ku daabacay barta X ku sheegay in diyaaradda ay dirtay codsi degitaan degdeg ah ka hor inta uusan go’in xiriirkeedu. Goobta ay ku burburtay diyaaradda ayaa markii dambe laga helay koonfur-galbeed magaalada Ankara.

Qoraal kale oo uu Wasiirku soo saaray ayaa lagu xaqiijiyay in hadhaaga diyaaradda laga helay agagaarka tuulada Kesikkavak ee degmada Haymana, iyadoo uu tilmaamay in natiijada baaritaanka lala wadaagi doono dadweynaha marka ay soo dhammaato.

Ra’iisul Wasaaraha Dowladda Midnimada Qaran ee Liibiya, Cabdul Xamiid Dbeibeh, ayaa xaqiijiyay geerida Janaraal Al-Xaddaad iyo saraakiil kale oo sarsare oo millateriga Liibiya ka tirsanaa, wuxuuna dhacdada ku tilmaamay “khasaare weyn” oo ku yimid qaranka Liibiya.

Janaraal Al-Xaddaad iyo wafdigiisa ayaa Turkiga u joogay xoojinta iyo ballaarinta iskaashiga dhinacyada milateriga iyo amniga ee u dhexeeya Liibiya iyo Turkiga.

Xafiiska Xeer-ilaaliyaha Guud ee magaalada Ankara ayaa bilaabay baaritaan rasmi ah oo ku saabsan shilka, waxaana loo xilsaaray afar xeer-ilaaliye oo hoos imanaya isku-duwidda ku-xigeenka xeer-ilaaliyaha guud. Ilaa hadda lama helin sanduuqa madow (black box) ee diyaaradda, waxaana la sheegay in sababta shilka la ogaan doono marka la dhammeeyo baaritaannada farsamo.

Dowladda Liibiya ayaa Turkiga u diraysa wafdi si ay ula socdaan baaritaanka socda, halka Agaasimaha Isgaarsiinta Madaxtooyada Turkiga, Burhanettin Duran, uu shacabka ugu baaqay in ay ku ekaadaan wararka iyo bayaannada ka imanaya hay’adaha rasmiga ah ee la xiriira shilka.