Isra’iil oo weerar cusub ku qaaday Iiraan
Isra’iil oo weerar cusub ku qaaday Iiraan
Isra’iil ayaa bilowday waxa ay ku tilmaantay “weerar ka hortag ah” oo ka dhan ah Iiraan, sida ay shaaciyeen mas’uuliyiinta Israa’iil.
Bayaan la soo saaray saaka, Wasiirka Difaaca Israa’iil, Israel Katz, ayaa ku dhawaaqay “xaalad degdeg ah oo gaar ah” oo laga hirgeliyay guud ahaan Israa’iil, isagoo xusay in tallaabooyinka amni la xoojinayo.
Warbaahinta Iiraan ayaa sheegtay in dhowr qarax laga maqlay bartamaha magaalada Tehran. Fars News Agency ayaa baahisay warar sheegaya in gantaallo dhowr ah ay ku dhaceen aagga Jamhuuriyadda ee caasimadda.
Dhanka kale, warbaahinta Israa’iil iyo Mareykanka ayaa sheegay in weerarka lala kaashaday Mareykanka. CNN ayaa soo warisay in weerarka Israa’iil lala kaashaday Mareykanka, halka Ynet News ay iyaduna sheegtay isla arrintaas.
Xiisaddan cusub ayaa imaneysa xilli horeyba ay u jireen khilaafyo iyo isku dhacyo siyaasadeed iyo militari oo u dhexeeya labada dal, taasoo keentay walaac ku saabsan suurtagalnimada in xaaladdu sii cakirmo gobolka.
