Trump oo ku hanjabay in uu canshuur saari doono badeecadaha Canada

Madaxweynaha Mareykanka Donald Trump ayaa digniin adag u diray dowladda Canada, isagoo ku hanjabay in Mareykanku uu 100% canshuur ku soo rogi doono dhammaan badeecadaha ka yimaada Canada, haddii ay heshiis ganacsi la gasho Shiinaha.

Trump ayaa hadalkan ku qoray bartiisa Truth Social, isagoo sheegay in heshiis kasta oo ganacsi oo u dhexeeya Canada iyo Shiinaha uu si toos ah u sababi doono tallaabo ganacsi oo culus oo Mareykanku qaado.

“Haddii Canada ay heshiis la gasho Shiinaha, isla markiiba waxaa lagu soo rogi doonaa 100% canshuur dhammaan badeecadaha ay soo geliso Mareykanka,” ayuu yiri Trump.

Ilaa hadda si rasmi ah looma oga heshiiska uu Trump tixraacayo. Si kastaba ha ahaatee, toddobaadkii hore Ra’iisul Wasaaraha Canada, Mark Carney, ayaa ku dhawaaqay in dalkiisu la galay Shiinaha “iskaashi istiraatiiji ah”, kaas oo ay ku heshiiyeen in la yareeyo canshuuraha ganacsiga.

Xilligaas, Trump ayaa tallaabadaasi ku tilmaamay mid wanaagsan, balse maalmahan dambe waxaa sii kordhayay xiisadda u dhaxeysa Mareykanka iyo Canada. Arrintaas ayaa sii xoogeysatay kadib markii Carney uu khudbad ka jeediyay shirka Davos, halkaas oo uu ku sheegay in nidaamkii caalamiga ahaa ee Mareykanku hoggaaminayay uu burburay.

Khilaafkan cusub ayaa muujinaya sida uu u sii xumaanayo xiriirka ganacsi iyo siyaasadeed ee u dhexeeya labada dal ee deriska ah.