Doon Muhaajiriin Sidday oo Ku Qallibmatay Xeebaha Turkiga
doon ay saarnaayeen muhaajiriin ay ku degtay badda
Hal qof ayaa ku dhintay, halka toddobo kalena la la’yahay kaddib markii doon ay saarnaayeen muhaajiriin ay ku degtay badda Aegean ee ku dhow xeebaha dalka Turkiga, sida ay sheegeen ilaalada xeebaha Turkiga.
Shilka ayaa ka dhacay agagaarka magaalada Dikili ee waqooyiga gobolka Izmir, xilli doon caag ah oo ay saarnaayeen muhaajiriin ay ku sii jeedday dhanka jasiiradaha Giriiga. Ilaalada xeebaha Turkiga ayaa xaqiijiyay in 37 qof oo rakaab ah si nabad ah loo badbaadiyay, kaddib howlgal degdeg ah oo lagu sameeyay goobta ay musiibadu ka dhacday.
Dikili oo ah magaalo yar oo dalxiis ayaa ku taalla meel u dhow jasiiradda Giriiga ee Lesbos, taas oo u jirta qiyaastii 20 kiiloomitir, isla markaana ah marin ay si weyn u isticmaalaan muhaajiriinta isku dayaya inay Yurub gaaraan.
Ilaalada xeebaha Turkiga ayaa sheegay in howlgallada baadigoobka ay wali socdaan, si loo helo toddobada qof ee la la’yahay, iyadoo la adeegsanayo doomo iyo qalab casri ah.
Shilalkan noocan oo kale ah ayaa si joogto ah uga dhaca marinnada halista ah ee u dhexeeya Turkiga iyo jasiiradaha Giriiga, kuwaas oo muhaajiriintu u adeegsadaan inay Yurub ku galaan. Sida ay sheegtay Hay’adda Socdaalka Caalamiga ah (IOM), ku dhawaad 1,900 oo muhaajiriin ah ayaa la waayay ama ku dhintay badda Mediterranean-ka sanadkii 2025, taas oo muujinaysa halista sii kordheysa ee safarrada tahriibka.
