Qaraxyo Lagu Weeraray Maraakiib Ruushka Leeyahay oo Marayay Xeebaha Turkiga

Hay’adaha badda ee Turkiga ayaa sheegay in qaraxyo ay haleeleen laba markab oo saliid sida, kuwaas oo ku sii jeeday Ruushka, taasoo sababtay dab ka kacay. Mid ka mid ah maraakiibta ayaa marayay waqooyiga Bosphorus markii qaraxu dhacay, halka kan labaad uu ku safrayay bariga Badda Madow.

Wararka hordhaca ah ayaa muujinaya in weerarku uu ka iman karo diyaarado aan duuliye lahayn (drone), iyadoo labada markabba ay ku jiraan liiska cunaqabataynta tan iyo duullaankii Ruushka ee Ukraine sanadkii 2022.

Shaqaalaha labada markab ayaa la badbaadiyay, sida ay xaqiijiyeen masuuliyiinta Turkiga.

Warar kale ayaa tilmaamaya in mid ka mid ah maraakiibta weli dab ka holcayo, iyadoo dowladda Turkiga ay gurmad u dirtay goobaha ay wax ka dhaceen.