Trump oo Ka Horyimid Go’aanka Maxkamadda Sare ee Mareykanka

Madaxweynaha Maraykanka, Donald Trump, ayaa soo rogay cashuur caalami ah oo cusub oo dhan 10%, si uu u beddelo cashuurihii ay hore u joojisay Maxkamadda Sare ee Mareykanka.

Trump ayaa go’aanka maxkamadda ku tilmaamay “mid xun,” isaga oo garsoorayaasha diiday siyaasaddiisa ganacsi ku eedeeyay inay khalad sameeyeen. Tallaabadan cusub ayuu ku dhawaaqay isla markiiba kadib markii maxkamaddu joojisay inta badan cashuurihii caalamiga ahaa ee Aqalka Cad ku dhawaaqay sanadkii hore.

Go’aanka Maxkamadda, oo ahaa 6-3, ayaa muujiyay in madaxweynuhu uu ka tallaabay awoodaha uu dastuurku siinayo marka ay timaado dejinta cashuuraha ganacsiga caalamiga ah.

Arrintan ayaa loo arkaa guul weyn oo u soo hoyatay ganacsiyada iyo gobollada Mareykanka ee ka soo horjeeday cashuuraha, iyadoo sidoo kale albaabka u furtay suurtogalnimada in dib loo celiyo balaayiin doollar oo cashuur ah. Si kastaba ha ahaatee, go’aanku wuxuu abuuray hubanti la’aan cusub oo ku saabsan jihada siyaasadda ganacsiga caalamiga ah ee Mareykanka.