Somaliland oo diyaargarowga Ebola xoojinaysa
Hargeysa, 31 May 2026 – Wasiirka Wasaaradda Horumarinta Caafimaadka Jamhuuriyadda Somaliland, Mudane Xuseen Bashiir Xirsi, ayaa maanta shir guddoomiyay kulan muhiim ah oo ku saabsan u-diyaargarowga ka hortagga cudurka Ebola, kaas oo diiradda lagu saaray qiimaynta iyo xoojinta heerka diyaargarowga qaranka, kadib markii cudurka laga soo sheegay dalalka Jamhuuriyadda Dimuqraadiga ah ee Congo (DRC) iyo Uganda.
Kulankan ayaa yimid xilli cudurka Ebola uu halis ku yahay Geeska Afrika iyo Bariga Afrika, iyadoo dalalka deriska ah ay kor u qaadeen dadaallada ka hortagga. Somaliland, oo mudnaanta siinaysa badbaadada caafimaadka bulshada, waxay bilawday qorshayaal iyo tallaabooyin hordhac ah si loo xoojiyo diyaargarowga qaranka, iyadoo laga filayo in maalmaha soo socda la qabanayo kulamo heer qaran oo lagu casuumayo hay’adaha caalamiga ah.
“Wasaaraddu mar walba heegan ugu jirtaa ka hortagga cudurrada faafa, xoojinta nidaamka caafimaadka iyo hubinta in muwaadiniintu helaan adeegyo caafimaad oo tayo leh, ammaan ah, isla markaana waxtar leh,” ayuu yiri Wasiir Xuseen Bashiir Xirsi. “Waxaanu diyaar u nahay inaan la shaqeyno bah-wadaagta caalamiga ah si loo xaqiijiyo heegan buuxa oo looga hortagayo xaalad kasta oo caafimaad oo degdeg ah.”
Wasiirku waxa uu intaas ku daray in kulankan uu ahaa bilowga kulamo taxane ah, isagoo sheegay in la qabanayo kulamo heer qaran oo lagu casuumayo wasaaradaha kale ee dowladda, hay’adaha caalamiga ah iyo bah-wadaagta caafimaadka, si loo xaqiijiyo wada-shaqayn, isu-duwid iyo heegan buuxa.
Kulanka waxaa ka qeyb galay Wasiir-ku-xigeenka, Agaasimaha Guud, iyo khubaro ka socotay Waaxda Caafimaadka Guud, Waaxda Qorshaynta iyo Siyaasadda, Waaxda Tallaalka iyo Caafimaadka Carruurta, Waaxda Xaaladaha Degdegga ah, iyo saraakiil ka socday Shaybaadhka Qaranka.
Cudurka Ebola waa xanuun halis ah oo si degdeg ah u faafi kara. Somaliland waxay ka go’an tahay inay la jaanqaaddo isbeddellada caalamiga ah, iyadoo hore uga digaysa faafitaan suurtagal ah. Dowladda waxay sidoo kale diyaarinaysaa qalabka shaybaadhka iyo xarumaha go’doominta haddii loo baahdo.