Nin Vietnam ah oo 20 sano la noolaa meydka xaaskiisa
Vietnam – 31 May 2026 – Nin u dhashay dalka Vietnam oo lagu magacaabo Le Van ayaa noqday mid si weyn looga yaabay kadib markii la ogaaday inuu muddo ka badan 20 sano la noolaaday meydka xaaskiisii geeriyootay, kaas oo uu qabriga kasoo saaray dhawr bilood ka dib dhimashadeeda, kuna hayay gurigiisa dhexdiisa isagoo ku daboolay dhoobo si uu u ilaaliyo qaabkiisa.
Sheekadan oo markii ugu horreysay si weyn loo shaaciyay dabayaaqadii sanadkii 2009, ayaa dib u soo cusboonaatay iyadoo ay warbaahintu ka hadlaysa cududda jacaylka iyo murugada keeni karto. Xaaskiisa ayaa geeriyootay sanadkii 2003, waxaana markii hore lagu aasay qabri ku yaalla deegaanka uu deganaa, laakiin Le Van ayaa sheegay inuusan u adkeysan karin kala maqnaanshaha.
“Uma adkeysan karin inaan ka fogaado xaaskayga,”
ayuu yiri Le Van markii la waydiiyay sababta uu u sameeyay arrintan. “Jacaylkaygii ayaa igu kalifay inaan sidan sameeyo, waxaanan rabay inaan iyada haysto meel ku dhow.”
Wararka ayaa sheegaya in uu meydka ku daboolay dhoobo iyo qalab kale si uu u ilaaliyo inuu qudhmo, kadibna uu gurigiisa dhexdiisa ku hayay muddo dheer. Shaqaalihii booliska ayaa helay meydka markii ay baaritaan ku sameeyeen gurigiisa, waxaana loola yaabay sida uu u ilaaliyay mudadaas dheer.
Culimo iyo khubaro cilmi-nafsi ahaan ayaa arrintan u faaliyay inay ka tarjumeysaa murugo daran oo qofka uusan diyaar u ahayn inuu aqbalo geerida qofka uu jecel yahay. Arrinta ayaa dhalisay dood ku saabsan dhaqanka Vietnam, murugada, iyo sida dadka qaar ula tacaalaan luminta kuwa ay jeclaayeen. Wakiilada mas’uuliyiinta deegaanka ayaa sheegay in la siiyay caawinaad cilmi-nafsi, meydkana si sharci ah loo aasay meel kale.
