Wararka aan Caawa ka heleyno degmada Afgooye ee Gobolka Shabeellaha hoose ayaa waxa ay sheegayaan in halkaasi lagu dilay mid ka mid ah Odayaasha Dhaqanka ee Degmadaas.
Odayga la dilay ayaa waxaa lagu Magacaabi jiray Nabadoon Duraan Axmed Cali,waxaana xiliga la dilayay uu ku sugnaa meel aan ka fogeyn hooygiisa oo ku yaalla Xaafada Xaawa Taako ee Degmada Afgooye.
Qof ka mid ah dadka degmada Afgooye ayaa Dalsan waxa uu u sheegay in koox hubeysan ay marxuumka ku toogteen afaafka hore ee Masjid uu doonayay in uu ku dukado Salaadii Maqrib.
Kooxdii ka dambeysay dilka Nabadoonka ayaa Goobta ka baxsatay,waxana gaaray ciidamo ka tirsan kuwa Maamulka degmada afgooye,kuwaas oo sameeyay howlgallo baaritano ah walow aysan dad ku qaban.
Dhanka kale waxan xiriir la sameynay Maamulka degmada Afgooye ee Gobolka Shabeellaha hoose si aan wax uga weeydiino dilka Nabadoonka balse kama jawaabin taleefoonadeena.
