Xuseen Macalin Maxamuud oo ah La-taliyaha amniga qaranka ee Madaxweynaha Soomaaliya, ayaa sheegay inay dib u bilowdeen howlgaladii ka dhanka ahaa dagaalamayaasha Al-Shabaab oo uu xusay inay u hakadeen waddooyinka oo biyaha roobabka galay, balse dib loo furay.
La-taliyaha oo ka hadlaayay kulan ka dhacay Muqdisho ayaa waxaa uu sheegay in dagaalka wejigiisa koowaad lasoo afmeeray, isla markaana dhawaan uu bilaabayo wejiga labaad oo ay wadaan abaabul iyo qorsheyaal kale oo ku wajahan dagaalkaasi.
Isaga oo sii hadlaayay Xuseen Macalin ayuu tilmaamay, in illaa iyo bisha febraayo ee sanadkan uu qaadan doono howlgalka dagaalamayaasha Shabaab looga xoraynayo Galmudug iyo Hirshabeelle, waa sida uu hadalka u dhigay.
Wuxuu kaloo xusay in dowladda Soomaaliya iyadoo cashar ka qaadanaysa weeraradii khasaaraha badan dhaliyay ee dhacay, inay si feejignaan ah ay dib ugula wareegayso degaannadii ay kasoo baxeen ciidamada dowladda.
Gaba-gabadii La-taliyaha amniga qaranka ee Madaxweynaha Soomaaliya ayaa carabka ku dhuftay in howlgallada Koonfur Galbeed iyo Jubbaland ku yimaadeen dib u dhac sababa la xiriira roobabka kala xiray waddooyinkii la mari lahaa.
