Waxaa Goordhow Magaalada Baydhabo ee Xarunta Baay kusoo dhammaatay doorashada kursi ka tirsan Golaha Shacabka Baarlamaanka 11-aad ee dowladda Federaalka oo deegaan doorashadiisu tahay Koonfur Galbeed.
Laba Musharax ayaa ku tartamay kursiga tirisgiisu yahay HOP184 oo afartii sanno ee lasoo dhaafay ku fadhiyay Xasan Cabdinuur Cabdi, waxaana doorashadii Maanta dhacday ee kursigaas ku tartamay Xasan Cabdinuur iyo Maxamed Cabdullaahi Cali.
Ergada loo xulay doorashada kursigaan HOP184 ayaa mar kale Xasan Cabdinuur Cabdi u doortay inuu noqdo Xildhibaan ka tirsan Golaha Shacabka Baarlamaanka, isla markaana waxaa uu helay codad gaaraya 72, halka Maxamed Cabdullaahi uu isna helay 27 Cod.
Guddoomiyaha Guddiga doorashada Koonfur Galbeed ayaa ku dhawaaqay Natiijada codeynta, isagoona sheegay in doorashada uu ku guuleystay Xasan Cabdinuur oo afartii sanno ee lasoo dhaafay ahaa Xildhibaan ka tirsan Golaha Shacabka.
Doorashada kuraasta harsan ee afarta ah ayaa isla Maanta ka dhici doonta Magaalada Baydhabo, waxaana doorashada ku tartamaya Musharaxiin dhowr ah oo Guddiga doorashada Koonfur Galbeed diiwaan-geliyeen.
