Wasiirka Wasaaradda Gaashaandhigga ee Dowladda Federaalka Soomaaliya, Cabdiqaadir Maxamed Nuur, ayaa sheegay in Al-Shabaab ay maalmihii lasoo dhaafay la kulmeen jab aad u baaxad weyn, isla markaana dagaalkii lagula jiray uu galay marxalad cusub.
Wasiirka ayaa tilmaamay in 20-kii maalmood ee lasoo dhaafay ay Ciidanka Xoogga Dalka Soomaaliyeed (CXDS) iyo dadka deegaanka oo iskaashanaya ay gaareen guulo waaweyn, taasoo keentay in khawaarijtu ay wajahayaan waqti adag.
“As jab aad u ballaaran ayaa 20-kii maalmood ee lasoo dhaafay ku gaarey gobollada dalka, rafadkii ugu dambeeyey ayey ku jiraan. Geesiyaasha CXDS iyo kuwa deegaanka waa mahadsanyihiin” ayuu yiri Wasiir Cabdiqaadir.
Ciidanka Xoogga Dalka iyo kuwa deegaanka ayaa dagaallo culus kula jarmaaday kooxaha Al-Shabaab, gaar ahaan gobollada Hiiraan iyo Shabeellaha Dhexe, halkaas oo lagu gaarsiiyay khasaare xooggan.
Saraakiisha hoggaaminaysa howlgalka ayaa sheegay in la dilay tiro badan oo ka tirsan horjoogayaashii sare ee kooxda, halka qaar kale gacanta lagu soo dhigay.
Magaalooyin iyo deegaanno muhiim ah ayaa laga xoreeyay AS, taasoo sii wiiqday awooddooda dagaal iyo dhaq-dhaqaaqooda militari.
Howlgallada ay wadaan Ciidanka Qaranka iyo shacabka is-kaashanaya ayaa maalmihii u dambeeyay xoogeystay, iyadoo dagaalku galay marxalad adag. Saraakiisha Ciidanka Qaranka ayaa xaqiijiyay in kooxdii cadowga ay lumiyeen dhul badan oo ay horey ugu dhuumaaleysan jireen.
Wasiirka Gaashaandhigga ayaa ugu dambeyn bogaadiyey ciidamada Qaranka iyo shacabka sida geesinimada leh uga shaqeynaya xasilloonida dalka, isagoo xusay in dagaalka lagu ciribtirayo kooxaha AS iyo Daacish uu sii socon doono ilaa laga gaaro guul buuxda.
