Qatar oo ka hadashay wadahadalada Mareykanka iyo Iiraan, kana gaabsatay dhexdhexaadin rasmi ah

Wasaaradda Arrimaha Dibadda ee Qatar ayaa sheegtay in dalkaasi uusan si toos ah uga qayb qaadan doonin dhexdhexaadinta u dhexeysa Mareykanka iyo Iiraan ee la xiriirta heshiiska nukliyeerka.

Arrintan ayaa lagu shaaciyay shir jaraa’id oo lagu qabtay magaalada Dooxa, halkaas oo masuul ka tirsan dowladda uu sheegay in mudnaanta hadda ay tahay in la joojiyo weerarrada ka socda gobolka.

Qatar oo hore uga mid ahayd dhexdhexaadiyeyaasha ugu waaweyn ee u dhexeeya Mareykanka iyo Iiraan, gaar ahaan ka hor dagaalkii 12-ka maalmood socday sanadkii hore, ayaa hadda sheegtay inay weli wado dadaallo diblomaasiyadeed oo lagu raadinayo xal nabadeed.

Mas’uulka ayaa sidoo kale xusay in Qatar ay sii wadi doonto xiriirka iyo taageerada ay la leedahay Iiraan, isla markaana aysan ka go’i karin.

Dhanka kale, waxaa la sheegay in Qatar ay wadahadallo la leedahay Mareykanka si loo sahmiyo xal diblomaasiyadeed oo lagu joojin karo colaadda, iyadoo la tilmaamay in Mareykanka uu dagaalka ku bilaabay sababo la xiriira amniga Bariga Dhexe.

Sidoo kale, dalal ay ka mid yihiin Masar, Pakistan iyo Turkiga ayaa isku dayaya inay door ka qaataan dhexdhexaadinta si loo soo afjaro xiisadda.

Wararka ayaa intaa ku daraya in Pakistan laga yaabo inay hoggaamiso wadahadallo lagu doonayo in lagu soo afjaro dagaalka, iyadoo la filayo inay halkaas ku kulmaan saraakiil sare oo ka kala socda Mareykanka iyo Iiraan, oo ay ka mid yihiin ergayga gaarka ah ee Donald Trump, Steve Witkoff, iyo madaxweyne ku xigeenka JD Vance.