Maxaa looga hadlay kulanka xalay ee Madasha Mucaaradka?

Magaalada Muqdisho ayaa xalay martigelisay kulan muhiim ah oo ay yeesheen siyaasiyiinta Madasha Mucaaradka, kaas oo diiradda lagu saaray xaaladda siyaasadeed ee dalka iyo habka doorasho ee la filayo inuu dalka ka dhaco mustaqbalka dhow.

Kulanka ayaa waxaa ka qeyb galay xildhibaanada mucaaradka ee labada aqal ee Baarlamaanka Soomaaliya, siyaasiyiin, iyo ururada bulshada rayidka ah.

Wararka la helayo ayaa sheegaya in mucaaradku si gaar ah uga doodeen nooca doorasho ee dalka laga qaban karo, gaar ahaan haddii Madaxweynaha Soomaaliya, Xasan Sheekh Maxamuud, mar kale isku soo sharxo kursiga Madaxweynaha. Qaar kamid ah madaxda mucaaradka ayaa muujiyay walaac ku saabsan sida ay u arkaan in Madaxweyne Xasan Sheekh “uusan muddada kooban ee u harsan ku qaban karin doorasho hufan oo waqtigeeda ku dhacda.”

Khilaafka mucaaradku ka muujiyeen kulanka ayaa salka ku haya arrimo ay ka mid yihiin:

1. Sida loo wajahayo qaabka doorasho ee xiga.

2. In dowladda ay ku adkaatay hirgelinta heshiisyadii hore.

3. Muddo xileedka yar ee ka harsan Madaxweynaha, oo mucaaradku aaminsan yihiin inuusan awood u lahayn inuu dib u habeyn doorasho ku furo dalka.

Sidoo kale, Madasha Mucaaradka ayaa qorsheynaya in 10-ka December ay u safraan magaalada Kismaayo, halkaas oo lagu wado inuu ka furmo shir siyaasadeed oo muhiim ah. Shirkaas ayaa lagu qiimeyn doonaa mustaqbalka doorashada iyo mowqifka mucaaradka ee marxaladda siyaasadeed ee dalka.

Kulankan Muqdisho iyo socdaalka la qorsheeyay ee Kismaayo ayaa qeyb ka ah dadaalka mucaaradka ee ay ku doonayaan inay ku mideeyaan aragtidooda siyaasadeed, xilli dalka uu galayo marxalad siyaasadeed oo xasaasi ah.