Wasaaradda Gaashaandhigga oo Bogaadisay Baaritaanka Xeer Ilaalinta Guud ee Qaranka ee La Dagaallanka Dhaqaalaha Argagixisada

Wasaaradda Gaashaandhigga ee Jamhuuriyadda Federaalka Soomaaliya ayaa si weyn u bogaadisay dadaalka muuqda ee uu qaaday Xafiiska Xeer Ilaaliyaha Guud ee Qaranka, kaasi oo lagu baadhay in ka badan 250 kiis oo la xiriira lacag-dhaqid iyo maalgelin si toos ah u taageeraysay kooxda Al-Shabaab.

Tallaabadan ayaa qeyb ka ah istaraatiijiyadda qaran ee dowladda Federaalka ku wiiqayso awoodaha milatari, dhaqaale iyo fikir ee kooxda . Sida lagu xusay warbixin rasmi ah, baaritaannadaasi waxay si qoto dheer u eeggeen in ka badan 3,500 akoon bangiyeed, iyadoo la xannibay hanti gaareysa $1 milyan oo doolar, taas oo ah guul muuqata oo laga gaaray la-dagaallanka maaliyadeed ee Alshabaab.

Wasaaradda Gaashaandhigga ayaa si gaar ah ugu mahadcelisay dhammaan hay’adaha dowladda ee door muuqda ka qaatay baaritaannadan, iyadoo tilmaantay in dadaalladaasi ay si toos ah u taageerayaan howlgallada geesinimada leh ee ay wadaan Ciidanka Xoogga Dalka Soomaaliyeed iyo laamaha kale ee amniga.

“Dagaalka lagula jiro Alshabaab ma ahan oo kaliya mid xabado lagu wajahayo, ee waa halgan ballaaran oo heer qaran ah. Waa in lala dagaallamaa dhaqaale ahaan, fikir ahaan iyo bulsho ahaanba,” ayaa lagu yiri war-saxaafadeedka Wasaaradda Gaashaandhigga.