Taliyaha Ciidanka Xoogga Soomaaliyeed, Sareeye Gaas Odawaa Yuusuf Raage, ayaa digniin culus kasoo saaray isbaarooyinka sharci-darrada ah ee yaalla qaybo ka mid ah magaalada Baladweyne iyo guud ahaan gobolka Hiiraan.
Odawaa oo la hadlayay bulshada magaalada Baladweyne, gaar ahaan odayaasha dhaqanka, ayaa ku nuuxnuuxsaday in aysan marnaba aqbali karin xaaladda ay waddooyinka gobolka ku sugan yihiin. Isagoo ka hadlayay arrintan, wuxuu yiri: “Kuma fiirsan karno, in isbaarooyin waddooyinka daadsan yihiin.”
Taliyaha ayaa tilmaamay in isbaarooyinkaasi ay fursad siin karaan kooxda Al-Shabaab, maadaama ay sii hurin karaan khilaafyada jira, taasoo khatar weyn ku ah nabadda iyo xasilloonida deegaanka.
Wuxuu xusay in magaalada Baladweyne iyo gobolka Hiiraan ay door muhiim ah ka qaateen kacdoonkii lagu xoreeyay dalka, isagoo yiri: “Magaaladan Baladweyne iyo guud ahaan gobolkan Hiiraan waxaan ognahay kaalintii ay ku lahaayeen kacdoonkii Khawaarijta dalka looga xoreeyay. Maanta in aan amnigeeda walaac ka muujinayno, waa nasiib darro weyn.”
Taliyaha Ciidanka Xoogga Soomaaliyeed ayaa bulshada gobolka farriin adag u diray, isagoo ku boorriyay inay ka qayb qaataan nabadda iyo xasilinta magaalada Baladweyne iyo guud ahaan gobolka Hiiraan.
Wuxuu ku adkeeyay muhiimadda ay leedahay iskaashiga bulshada iyo ciidamada amniga si meesha looga saaro caqabadaha amni ee jira.
Guud ahaan, hadallada Taliyaha ayaa u muuqda kuwo si cad u muujinaya go’aanka Dowladda Federaalka Soomaaliya ee ku aaddan sidii loo sugi lahaa amniga Hiiraan iyo meesha looga saari lahaa isbaarooyinka sharci-darrada ah ee khatar ku ah horumarka iyo xasilloonida gobolka.
