Iyadoo ay Dowladda Giriigga soo rogtay inay Tahriibayaasha soo gaara xeebaheeda dib ugu celin doonto dalka Turkiga, ayaa waxay Tahriibayaasha bilaabeen inay ka sii shiraacdaan Xeebaha Giriigga.
Dooni ay la socdeen 22 Tahriibayaal u kala dhashay Somalia iyo Syria waxay maalintii Khamiistii la soo dhaafay si nabad ah ku gaareen Xeebta magaalladda Otranto ee K/bari Talyaaniga.
Arrintan ayaa ku soo beegantay iyadoo ay Hay’adda QM ugu qaabilsan Arrimaha Qaxootiga ee UNHCR walaac xooggan ka muujisay go’aanka ay Dowladda Giriigga ku gaartay inay dib u celiyaan qaxootiga doonyaha ku soo gaara Xeebaheeda.
Afhayeenka UNHCR, Melissa Fleming ayaa ugu baaqay Midowga Europe iyo Turkiga in la badbaadiyo Qaxootiga, iyo inaan kuwa soo gaara Giriigga dib loogu celinin Turkiga.
Dalka Giriigga waxaa haatan ku sugan ku-dhawaad 51,000 oo Tahriibayaal iyo Qaxooti, kuwaasi oo ku kala sugan Jesiiradaha Qubrus iyo goballadda kale.
Jesiiradda Lesvos ayaa la sheegay in Boliska Giriigga bilaabeen inay dadka qabtaan, si ay ugu celiyaan Turkiga, wuxuuna Go’aankan dhaqan galay bishii la soo dhaafay ee Maarso 24-da.
©Radio Dalsan
